Vosburg - 'n oase vir jou hart.

Tussen Carnavon en Britstown, draai 'n mens links van die N12 na Vosburg af. Jy sien die groen oase reeds 'n paar kilometer voordat die "Welkom bord" jou oog vang. Welkom is presies hoe 'n mens voel. Almal groet mekaar op die naam, met 'n stywe handdruk of soms met 'n opregte omhelsing - nog voor jy eers jouself voorgestel het. Dit is nie iets waaraan hierdie stadsjapie gewoond is nie en het 'n baie spesiale, blywende indruk op my gemaak. ’n Stappie deur die dorp voel soos ’n reis terug in tyd. Breë grondpaaie, digte lanings "Beefhout", Sipresse en Peperbome. Nederige Karoo huise met sinkplaat verandas, 'n koöperasie, dorpshotel asook vrolike koffiewinkels en gastehuise.

Die pragtige ou Nederduits Gereformeerde kerk staan trots in die middel van die dorp met oorspronlike loodglas vensters en 'n spogtuin wat deur vroue van die gemeenskap versorg word.

Die museum is vol outydse skatte

waarvan die glas lykswa die grootste een is.

.

Die omgewing rondom Vosburg is ’n paradys vir fotograwe, voëlliefhebbers en almal wat hou van die rou, eerlike skoonheid van die Karoo. Eindelose horisonne, ysterklip koppies en goue sonsondergange laat jou opnuut weer besef hoe bevoorreg jy is om Suid-Afrika jou geboorteplek te noem.

Mense sê dikwels jy besoek nie Vosburg nie - jy kom huis toe. Dis die soort plek wat ’n mens se siel aanraak, waar eenvoud soos luuksheid voel en gemeenskap soos familie. Ek het dit die afgelope 4 dae ervaar en verstaan nou waarom mense hul lewens in Gauteng oppak om 'n nuwe hoofstuk hier te begin...tussen Vosburg se koeltebome...'n oase vir jou hart.