Tien redes om die Vosburg Camino te stap.

Mense stap caminos vir verskillende redes. Meestal omdat hulle op soek is na iets; oefening en ontspanning, stilte, genesing, of om weer tyd saam met hulself, die natuur of iets groters te spandeer.  

Die redes vir my eerste 100km staptog tussen Struis- en Grangerbaai was eenvoudig: Ek is lief vir stap, mal oor die see en ek sou saam met een van beste vriendinne, Elna, stap.  

Wat ek gedurende die L2L (Lighthouse to Lighthouse) geleer het oor myself en oor ander vroue is eintlik ook eenvoudig: Ons almal hou daarvan om iets vir ander mense te beteken, raakgesien te word en om te voel dat ons behoort.    Hier is tien redes waarom ek dink jy die Vosburg Camino moet stap:  

1. Vind Stilte  Die lewe is gejaagd; die pas is te vinnig. Die Vosburg Camino se slagspreuk is "Stilte sonder grense." Dit bied jou lang, stil oomblikke waar die geraas uiteindelik stil word. Jou groot vrae word kleiner - en antwoorde  word duideliker.   

2. Vind genesing  Hetsy werksdruk, ooreising of 'n behoefte om emosioneel of spiritueel te genees - die ritme van stap is terapeuties. Die Karoo landskap maak seer gesond.   

3. Ontsnap en ontspan  Geen sperdatums, geen verantwoordelikhede en geen verwagtinge.  Die Vosburg Camino gun jou tyd om net te wéés.   

4. Tyd in die Natuur  Die moderne lewe hou 'n mens dikwels binneshuis en is oorstimulerend. Ons camino bring jou terug na eenvoud: sonsopkomste en ondergange, wye soutbos vlaktes, die reuk van reën en die grootse sterrelug  wat 'n mens gewoonlik net in reistydskrifte sien.  Die Natuur het 'n manier om jou innerlike balans te herstel. Dit maak jou weer gegrond.   

5. 'n Geloofstog of persoonlike pelgrimstog  Vir baie mense is 'n camino 'n geestelike ervang - 'n tipe pelgrimstog. Al is jou doel nie ’n geloofstog nie,  die Karoo gaan sonder twyfel aan jou siel raak.   

6. 'n Gevoel van gemeenskap  Selfs wanneer jy  alleen stap, gaan jy deel voel van iets spesiaal. Oggend-koffies op die stoep, 'n helpende hand of bemoedigende woorde wanneer iemand baie moeg is. Die gevoel van kameraderie, die "ons stap saam", selfs tussen vreemdelinge, is altyd daar.   

7. Toets jouself  Miskien het jy 'n fisiese- of geestelike uitdaging nodig. Die Vosburg Camino sal jou uithouvermoë beproef, jou veerkragtigheid ’n hupstoot gee en wys dat jy soveel sterker is as wat jy ooit gedink het.   

8. Aanvaarding en ’n nuwe begin Ons almal het 'n storie. Daar is verskeie redes waarom ons die mens is wie ons is. Soms is dit nodig om teleurstelling, skuldgevoelens, spyt of verlies te aanvaar voordat jy jou nuwe hoofstuk kan begin skryf.   

9. Leef in die oomblik  Die Vosburg camino sal jou weer jou sintuie laat herontdek, laat fokus op wat rondom jou aangaan en bewus maak van soveel mooi rondom jou.   

10. Onthou wie jy is  Ek dink hierdie is die grootste rede vir my: Stap stroop jou van al jou maskers, die voorgee van alles wat jy nie regtig is nie. Dit wat oorbly is eerlik, werklik en diep gegrond. 
    

Elna en ek nooi jou daarom uit. Kom onthou weer wie jy is en wat regtig belangrik is deur die Vosburg Camino saam met ons te kom stap.

Geredigeer deur Doktor Jaline de Villiers